រាជអាវុ​ធហត្ថ​រាជធានីភ្នំពេញ​ ឃាត់ខ្លួន​ជនឆបោក២នាក់​ ពាក់ព័ន្ធករណីបន្លំ​ជាសាច់ញាតិ​ ឯកឧត្តម យឹម លាង និង​បោក​ប្រាស់ពលរដ្ឋ​១០០នាក់ អស់ប្រាក់រាប់ម៉ឺន​ដុល្លារ​រឿង​ចូលក្របខណ្ឌកងទ័ព​

ភ្នំពេញ ៖ ជនសង្ស័យ០២នាក់ ត្រូវបានអាវុធហត្ថរាជធានីភ្នំពេញ បញ្ជូនទៅតុលាការនាព្រឹកថ្ងៃអង្គារ ទី១៣ ខែសីហា ឆ្នាំ២០១៩ បន្ទាប់ពីបានឃាត់ខ្លួនជាបន្តបន្ទាប់។

ជនសង្ស័យ៖ ទី១. ឈ្មោះថា ប៊ិន ឡាច ហៅ វ៉ែន សារ៉ាត់ ភេទប្រុស ឆ្នាំកំណើត១៩៦២ ត្រូវបានឃាត់ខ្លួនកាលពីថ្ងៃទី០៩ ខែសីហា ឆ្នាំ២០១៩ នៅចំណុចភោជនីយដ្ឋាន ណានជីង សង្កាត់មិត្តភាព ខណ្ឌ៧មករា។

ទី២. ឈ្មោះ ឈ្មោះ តុប គឹមហុង ហៅ យឹម ឈុនហុង ភេទប្រុស ឆ្នាំកំណើត១៩៧៣ ត្រូវបានឃាត់ខ្លួននៅព្រឹកថ្ងៃទី១២ ខែសីហា ឆ្នាំ២០១៩ ត្រង់ចំណុចទល់មុខភោជនីយដ្ឋានព្រឹកថ្មីល្ងាចស្រស់ ផ្លូវ១១៥កែង២៧៤ សង្កាត់បឹងប្រលឹត ខណ្ឌ៧មករា។

ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញ ជនសង្ស័យ បានសារភាពថា ឈ្មោះ តុប គឹមហុង បានប្រើល្បិច ប្តូរឈ្មោះជា យឹម គឹមហុង កុហកជនរងគ្រោះថា ជាបងប្អូនជីដូនមួយរបស់ឯកឧត្តម យឹម លាង ព្រមទាំងកុហក់ជនរងគ្រោះទៀតថា នៅពេលឆាប់ៗខាងមុខនេះ ឯកឧត្តម យឹម លាង នឹងទៅកាន់អគ្គនាយកដ្ឋានវិស្វកម្ម ហើយបង្កើតនាយកដ្ឋានថ្មីចំនួន០៦ ត្រូវការជ្រើសបុគ្គលិកចំនួន៣០០នាក់ ហើយគេអាចបញ្ចូលក្របខណ្ឌបាន ដោយត្រូវចំណាយប្រាក់ទៅតាមឋានន្តរសក្តិ។

ក្នុងនោះថ្នាក់វរសេនីយ៍ តម្លៃ៥,៥០០$ ទៅ៦,០០០$ ថ្នាក់អនុសេនីយ៍ឯក តម្លៃ៤,៥០០$ ទៅ ៥,០០០$ ថ្នាក់អនុសេនីយ៍ទោ តម្លៃ៣,៥០០$ ទៅ៤,០០០$ ថ្នាក់អនុសេនីយ៍ត្រី តម្លៃ២,០០០$ ទៅ២,៥០០$ និង ថ្នាក់ពលទាហាន តម្លៃ៧០០$ ទៅ១,០០០$។

ពួកគេបានធ្វើសកម្មភាពបែបនេះ ឆបោកប្រាក់ ពីជងរងគ្រោះ សរុបប្រមាណ១០០នាក់ហើយ តែពុំមានជនរងគ្រោះណាម្នាក់បានចូលក្របខណ្ឌឡើយ រហូតព័ត៌មាននេះ បានឮដល់ឯកឧត្តម យឹម លាង ឯកឧត្តម ក៏ប្តឹងមកកងរាជអាវុធហត្ថរាជធានីភ្នំពេញ ឲ្យធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យតែម្តង៕

Author: Virak Tep

Leave a Reply

Your email address will not be published. Required fields are marked *