អាជ្ញាធរ​ស្រុកមណ្ឌលសីមា ខេត្តកោះកុង​ បាន​ត្រឹម​ឈរមើលក្រុមឈ្មួញ​មានអំណាច​ច្បាមយកដីរដ្ឋធ្វើជាកម្មសិទ្ធ

កោះកុង​ ៖ បច្ចុប្បន្នសកម្មភាព​កាប់ទន្ទ្រាន​យកដីព្រៃលិច ព្រៃកោងកាង ស្ថិតនៅក្នុង​ឃុំ​ចំនួន​២ គឺទទួលគគីរ និង​ឃុំ​ប៉ាក់ខ្លង ខេត្តកោះកុង​ កំពុង​ត្រូវបានក្រុមឈ្មួញ​មាន​អំណាច បាន​ប្រើសិទ្ធ​របស់ខ្លួន​ក្នុងការទន្ទ្រាន​យកដីចំណីព្រែក​​ លុប​សមុទ្រ យកធ្វើជាកម្មសិទ្ធផ្ទាល់ខ្លួនយ៉ាងគឃ្លើនតែម្តង សូម្បីតែអាជ្ញាធរ​ក៏មិន​ហ៊ានប្រតិកម្មសូម្បីតែបន្តិច។

បើតាមប្រភពពីប្រជាពលរដ្ឋ​ បានថ្លែង​ប្រាប់ថា ក្រុមឈ្មួញ​បាន​ធ្វើសកម្មភាព​ដោយ​បានជួលកម្មករ​មកអារឈើ និង​បាន​កាយដីយកមកលុបដីសមុទ្រ ដីព្រែក ទាំងកំរោលតែម្តង អាជ្ញាធរ​បាន​ត្រឹម​តែអោបដៃរមើល​ និង​បានត្រឹមតែ​លើក​ពី​ការអំពាវនាវ​របស់​លោកជំទាវ​អភិបាលខេត្តតែប៉ុណ្ណោះ ប៉ុន្តែ​មិនអាចធ្វើអ្វីបានចំពោះក្រុមឈ្មួញនោះទេ។ ទីតាំង​ខ្លះក្រុមឈ្មួញ​ ថែមទាំង​បាន​យកដីប្រជាពលរដ្ឋ​ធ្វើជាកម្មសិទ្ធផ្ទាល់ខ្លួនទៀត ដោយ​គ្មាន​ញញើត​នឹងផ្លូវ​ច្បាប់សូម្បីតែបន្តិច ព្រោះថា​ ពួកគេជាអ្នកមាន​លុយ និង​អំណាច​ ហើយ​ថែមទាំង​បាន​សហការគ្នា​យ៉ាងជិតស្និតជាមួយ​ជំនាញ​ទៀតផង។

កន្លងមក​លោកជំទាវ​ មិថុនា ភូថង អភិបាលខេត្តកោះកុង បានធ្វើការប្រកាស និង​អំពាវនាវ​ ដល់ប្រជាពលរដ្ឋ​ទាំង​អស់ សូមមេត្តាកុំ​ចាញ់ល្បិច​ញុះញង់​បោកបញ្ឆោត​របស់ជនឆ្លៀត​ឳកាសមួយចំនួន​ ដែលចង់បាន​តែផលប្រយោជន៍ផ្ទាល់ខ្លួន។ ដូច្នេះ​សូមបងប្អូន​បញ្ឈប់ជាបន្ទាន់​ នូវសកម្មភាព​កាប់ទន្ទ្រានដីព្រៃរបស់រដ្ឋ​ ដោយ​ខុសច្បាប់​យកមកធ្វើជាកម្មសិទ្ធផ្ទាល់ខ្លួន​ ឬលក់ឲ្យអ្នក​ដ៏ទៃ ដែលអាច​ប្រឈមមុខ​នឹងផ្លូវច្បាប់។

ប៉ុន្តែ​ជាក់ស្តែង​ ការអំពាវនាវរបស់អភិបាល​ខេត្ត​ បាន​ត្រឹមតែការអំពាវនាវនោះទេ ដោយ​សារតែមន្ត្រីថ្នាក់ក្រោម​មិន​បាន​យកចិត្ត​ទុកដាក់ក្នុងការបំពេញភារកិច្ច​របស់ខ្លួន​ ដោយ​បាន​បណ្តែត​បណ្តោយ​ឲ្យមាន​បទល្មើសកាប់ទន្ទ្រាន​យកដីព្រៃរបស់រដ្ឋ​ និង​ដីមាត់សមុទ្រ​ យកធ្វើ​​ជាកម្មសិទ្ធរបស់ខ្លួន​យ៉ាងរំភើយ​។

ជុំវិញបញ្ហាខាងលើ ហាក់ ឡេង អភិបាលស្រុកមណ្ឌលសីមា លោកធ្លាប់បានប្រាប់ក្រុមអ្នកសារព័ត៌មានអោយដឹងថា រឿងរ៉ាវចាក់ដីលុបព្រែកនៅឃុំប៉ាក់ខ្លង លោកបានចុះធ្វើការហាមឃាត់រួចហើយ និងបានធ្វើរបាយការណ៍ជូនដល់ថ្នាក់ខេត្តរួចហើយដែរ តែចំពោះចំណាត់ការបន្តយ៉ាងណានោះលោកក៏កំពុងរងចាំចម្លើយពីថ្នាក់ខេត្តដែរ។

ដោយឡែក លោក ម៉ន ផល្លា ប្រធានមន្ទីរបរិស្ថានខេត្តកោះកុងវិញ ពុំទាន់អាចទំនាក់ទំនងសុំការបំភ្លឺបាននៅឡើយទេទាក់ទិននិងការកាប់រុករានទន្ទ្រានយកដីព្រៃលិចទឹក ព្រៃកោងកាង ក្នុងតំបន់អភិរក្សដែលគ្រប់ដោយក្រសួងបរិស្ថាន និងការចាក់លុបព្រែក ពិសេសការចាក់លុបសមុទ្រនៅចំនុចពយជិនទុង ភូមិជ្រោយស្វាយ ឃុំជ្រោយស្វាយ ស្រុកស្រែអំបិល ខេត្តកោះកុង ពីសំណាក់មន្ត្រីយោធាជើងទឹកថ្នាក់ឩត្តមសេនីយ៍ ហួរ ហាប់។

គួររំលឹកថា ការទន្ទ្រានដីព្រៃលិចទឹក និងចាក់លុបព្រែក សមុទ្រ ដែលជាសម្បត្តិសារធារណះរបស់រដ្ឋ បានកើតឡើងស្ទើរគ្រប់គ្រប់ស្រុកក្នុងខេត្តកោះកុង កត្តាទាំងនេះបានកើតឡើងដោយសារតែតម្លៃ​ដីក្នុងខេត្តកោះកុងកំពុង​ឡើង​ថ្លៃ ពិសេសក្នុងស្រុកបុទុមសាគរ និងស្រុកគិរីសាគរ ជាដើម​៕

Author: Virak Tep

Leave a Reply

Your email address will not be published. Required fields are marked *